IPPO director, nagpa-athag kon ngaa wala gihapon napasakaan sang kaso ang nakuhaan sang mga armas sa one-time big-time police operation sa 5th district

IPPO Headquarters, Sta. Barbara, Iloilo–Ginapadalman pa sang Iloilo Police Provincial Office ang imbestigasyon sa mga na-recover nga armas sa balay sang mga Salcedo sa ginhimo nga joint police operation sa Sara sang Oktubre 17.

Ini ang rason suno kay IPPO Director Marlon Tayaba kon ngaa asta subong, wala nila na-file ang kaso.

Suno sa iya, gina-verify pa nila sa Firearms and Explosives Office (FEO) sa Camp Crame kon legal ang mga narecover nga armas sa balay sang mag-asawa nga former Mayor Neptali Salcedo kag incumbent Mayor Ermelita Salcedo.

Ginpahayag sang IPPO Director nga may ginapresentar nga dokumento ang mga Salcedo nga nagapamatuod suno sa iya nga lisensyado ang mga armas apang indi pa ini makumpirmar tubtub nga wala pa nag-abot ang resulta sang forensic examination.

Sa pagpati ni Tayaba, clone ang mga narecover nga pusil bisan pa may serial number kag may ngalan.

Daku nga palamangkutanon suno sa iya kon ngaa ara sa mga Salcedo ang mga pusil nga gina-issue lang sa Armed Forces of the Philippines (AFP) kag sa Philippine National Police.

Gin-athag ni Tayaba nga wala man sila nagadali nga i-file ang kaso bangud wala man sila sang may gin-custody.

Luyag lang sang IPPO suno sa iya nga masiguro nga mabakod ang kaso nga ipasaka agud indi dali-dali nga ma-dismiss sang fiscal. (AGB)