2 ka driver sang motorsiklo, patay sa magkatuhay nga aksidente sa probinsya

Iloilo–Patay ang 22-anyos nga lalaki sang nagbunggu-anay ang ginamaneho niya nga motorsiklo kag Isuzu Sportivo sa Barangay Tabucan, Cabatuan alas-5:50 kaina sang aga, Nobyembre 2.

Ginkilala ang napatay kay Jan Nino Celeste, 22 anyos sang San Nicolas, Calinog. 

Gin-identify naman ang driver sang Isuzu nga si Cynthia Tanchuan, 58 anyos sang Tiring, Cabatuan.

Suno kay PO2 Jasper Canto sang Cabatuan Police Station, halin sa Calinog kag padulong sa direksiyon pa-syudad si Celeste. Sang yara na sa Tabucan, antes ang taytay, naglapaw siya sa pihak nga lane kag nakabunggo sa Isuzu Sportivo.

Gindala pa sa ospital si Celeste apang napatay bangud sa patal nga pilas sa agtang, dughan kag tiil. Gindala man sa ospital si Tanchua bangud sa highblood. 

Samtang patay man ang driver sang motorsiklo kag pilason ang iya duha ka angkas sang na-aksidente sa Barangay Bayuyan, Estancia kaina sang kaagahon.

Gindeklarar nga napatay sa ospital si Gerry del Rosario, 21 sang Tabu-an, Estancia. Kritikal ang iya angkas nga si Ken Harvey, 18. Pilason man si alyas Mick, 16, nga kaupod man nila sa motorsiklo.

Nagsuhot ang motorsiklo sa idalum sang naka-park nga truck sa kilid sang karsada. Posible suno kay PCI Jonah Galicha, hepe sang Estancia MPS, nga wala natalupangdan ang truck bangud wala sang early warning device. Nagpasalig naman ang tag-iya sang truck nga mabulig sa pamilya sang mga biktima. (AGB)