(UPDATE) 79 anyos nga lola kag 2 niya ka apo, patay sa sunog sa Jaro kaina sang kaagahon; ginabanta P400,000 kahalitan sang sunog suno sa Bureau of Fire Protection

Iloilo City–Apat ang totally damaged kag apat man ang partially damaged nga mga balay sang nasunog sa MH Del Pilar, Jaro kaina sang kaagahon, Nobyembre 2.

Patay ang mag-lola nga sanday Natividad Fanunciano, 79, kag mga apo nga sanday Iman kag Ivan sang wala nakaguwa sa ila naupos nga balay.

Suno sa residente nga si Toni, sang nakita nila nga nagakalayo ang balay ni Fanunciano, nagbuligay sila agud mapalong ang kalayo apang ilabe pa nga nag-ibwal. Pila ka beses man nila nga gintawag ang mag-lola apang wala gid nakabati. Indi man nila masulod ang balay bangud naka-kandado ini.

Nagapangalisod naman ang mga malapit nga abyan sang tigulang bangud nadulaan sila sang iloy-iloy.

Suno kay Alyas Gigi, mabuot nga kasilingan ang tigulang.

Nagatrabaho sa luwas sang pungsod ang bata ni Panunciano nga iloy sang duha ka napatay nga apo. Napahibalo naman suno kay Gigi ang bata sang tigulang sa natabu. (AGB)