Bangkay sang lola kag 2 niya ka apo nga nalakip sa sunog sa Jaro, ipa-autopsy sang pamilya

Jaro, Iloilo — Plano sang pamilya nga ipa-autopsy ang bangkay ni Natividad Fanunciano, 79, kag mga apo niya nga sanday Eman, Grade 6 pupil, kag Ivan, Grade 5 pupil nga napatay sa sunog pasado alas-3 kahapon sang kaagahon.

Suno kay Fire Chief Inspector Christopher Regencia, City Fire Marshal, nakita ang sunog nga bangkay sang maglola sa kuwarto sa ibabaw. Posible nga na-trap sila bangud naghalin ang kalayo sa idalum.

Ginalauman suno kay MH Del Pilar Punong Barangay Larry Palomo nga maabot subong nga adlaw ang ginikanan sang duha ka bata. Nagatrabaho sa Middle East ang mga ginikanan kag si Fanunciano ang nagatatap sa mga bata.

Nagatenir naman sa ila mga himata ang iban pa nga nasunugan kag nakahatag naman sang bulig ang City Government suno sa kapitan. Totally gutted sa sunog ang duha ka balay ni Fanunciano kag balay nanday Rolando Arguelles kag Zenaida Ruiz.

Partially damaged naman ang balay nanday Editha Jeruta, Milagros Sibag, Leila Ruiz kag Agri Malicia. (JoMaque)