Traffic enforcer, gindakup matapos nanghandus sang kutsilyo sa trisikad driver nga iya ginsaway
Barotac Nuevo, Iloilo–Napilasan sa tuo nga butkon ang traffic enforcer sang nagpukutay sila sang trisikad driver nga iya ginhandus sang kutsilyo las 7 kaina sang aga, Nobyembre 3.
Suno kay Police Inspector Ray Pueyo, hepe sang Barotac Nuevo Police Station, ginsaway sang traffic enforcer nga si Lucerio Deocampo, 61 anyos sang Barangay Acuit, Barotac Nuevo, ang trisikad driver nga si Ronald Quirino, 44 anyos, sang amu man nga barangay bangud nagsulod sa ginadumilian nga dalan.
Ginpahayag nga wala nagpati ang driver gani nagsabtanay ang duha tubtob nga gingabot ni Deocampo ang ginataklos niya nga kutsilyo kag ginhandos si Quirino.
Naagaw naman ni Quirino ang kutsilyo sang traffic enforcer tubtub nga nagpukutay ang duha kag napilasan sa tuo nga butkon si Deocampo.
Naaresto ang traffic enforcer sang nagresponder nga pulis. (AGB/KJT)