Bangkay sang promodiser, nasapwan sa kuwarto sang iya boarding house

Mandurriao, Iloilo City — Ara na sa advance state of decomposition ang bangkay sang promodiser sang nasapwan sa isa ka boarding house sa Brgy. Bolilao, kahapon, Nobyembre 3.

Ginkilala ini kay Robert Besa, 31 anyos sang Balucuan, Dao, Capiz nga nagatrabaho nga promodiser sa SM Delgado. Suno sa pamilya Villegas, tag-iya sang boarding, lima ka tuig na nga naga-board sa ila si Besa.

Sa pagpangusisa, naka-duty pa ini sang Oktubre 31. Kahapon, natingala ang tag-iya sang boarding house nga may nagapanimaho sa balay kag natukiban nga halin ini sa kwarto sang lalaki.

Sang ginling-ling sa kisame, nakita ang nagahamyangon nga lawas ni Besa. Posible suno sa land lady nga ginbangungot ang lalaki. I-autopsy ang bangkay ni Besa agud mahibaluan kon may foul play sa iya kamatayon. (JoMaque)