Iloilo, gintay-ug sang magkasunod nga linog

Iloilo City–Gintay-og sang sunod-sunod nga linog ang syudad kag probinsya sang Iloilo kag mga kaiping nga probinsya kaina sang aga, Nobyembre 5.

Una nga nagluntad ang mabaskog nga linog nga na-record ang epicenter sa San Jose, Antique kag may kabaskugon nga magnitude 4.7 las 7:45 sang aga. Nabatyagan ang Intensity III sa Iloilo City.

Las 7:46 sang aga, nagluntad ang linog nga epicenter ang Sibunag, Guimaras nga may kabaskugon nga magnitude 4 kag nabatyagan man ang Intensity IV sa Iloilo City.

Ang ikaduha nga mabaskog nga linog, nabatyagan las-10:45 sang aga. Suno sa PHIVOLCS-Roxas City, na-record ang epicenter sang linog sa Guimabl nga may kabaskugon nga magnitude 4.8. Intensity IV ang nabatyagan sa syudad ang Iloilo.

Nakarecord liwat ang Phivolcs sang linog sa Sibunag kag Buenavista, Guimaras kag Leon, Iloilo apang wala na nabatyagan ang pagtay-og.

Ginpahayag ni Ms. Lara Guilanan sang Phivolcs-Manila nga above average ang linog nga nagluntad sa San Jose, Antique kag Guimbal. (AGB)