(UPDATE) 2 ka lalaki nga ginreklamo naghimulos sa 18 anyos nga dalaga sa sulod sang patyo sa Oton, nagsulit nga wala nila ginpwersa ang complainant

Oton, Iloilo–Ginsulit sang duha ka lalaki nga ginreklamo naghimulos sa 18-anyos nga dalaga sa sulod sang patyo ang pagpanginwala alegasyon sang complainant.

Suno kay alyas George, wala nila gin-harass ukon ginpilit si alyas Luningning. Ang babaye pa suno sa iya ang nagpakita sang motibo sa ila kag nagpasugot nga may matabu sa ila.

Antes ang insidente, makapila ka beses suno kay George nga nagalabay-labay si Luningning samtang naga-inom inom sila gani ila ginhagad apang nagpamalibad ang babaye. Pero sang ulihi, ginhagad man sila sang dalaga nga mag-inom sa sulod sang patyo tubtub natabu ang ginpahayag paghimulos.

Nakibot na lang sanday George kag alyas Boy sang gulpi naghibi si Luningning kag naghambal nga ipadakup sila kag pasakaan sang kaso. Nagpahayag sang kahanda ang duha nga atubangon ang kaso batuk sa ila.

Nagapati naman si alyas Ricky, 62 anyos, amay ni Luningning, nga ginpilit sang mga suspek ang iya bata. Suno sa iya, nagsalig si Luningning bangud kasilingan nila si alyas Boy gani napilitan nga mag-upod sang ginhagad nga mag-inom.

Natalupangdan sang amay nga nagaka-urungan ang iya bata pagkatapos sang insidente. Una na gin-alegar sang tagreklamo nga ginpahog siya sang mga suspek nga kastiguhon kun indi magpasugot sa himuon sa iya. (AGB)