2 patay sa aksidente sa Janiuay

Janiuay, Iloilo – Patay ang driver sang motorsiklo kag iya angkas sa aksidente sa Barangay Matag-ub pasado alas-7 kagab-i, Nobyembre 5.

Gin-identify ni PO1 Pio Estampador sang Janiuay Police Station ang napatay kanday alyas Nono, driver sang motorsiklo kag residente sang Barangay Patong-Patong, kag alyas Rube, 15 sang Capt. A. Tirador (Poblacion), bangud sang patal nga pilas sa ulo. Nakaluwas ang isa pa ka angkas nga si Shiela Taburada, 29 sang Sta. Rita Street, Janiuay, nga bali ang tuo nga kamot kag tuo nga tiil.

Sa pagpamangkot sang police kay Taburada, ginsaysay niya nga nag-overtake ang ila motorsiklo sa Ceres bus apang may nasumalang sila nga pick-up. Nagbunggu-anay ang motorsiklo kag pick-up. Nakasagaid pa gid suno kay PO1 Estampador ang motorsiklo sa wala nga kilid sang Ceres bus.

Ginpahayag ni Estampador nga nag-surrender sa Calinog police ang driver sang pick-up. (JoMaque)