Phivolcs, nagtadlong nga Leon, Iloilo ang epicenter sang 3 mabaskug nga pagtay-ug

Iloilo City (UPDATE) – Tatlo ka linog ang na-record nga nagtay-og sa Isla sang Panay kag Guimaras kahapon sang aga, Nobyembre 5.

Suno kay Engr. Reynaldo Antioquia sang PHIVOLCS- Capiz, nagluntad ang linog las-7:45; las-7: 46 kag las-10:54 sang aga.

Gintadlong ni Antioquia nga base sa ila updated report, ang epicenter sang tatlo ka linog na-record tanan sa Leon, Iloilo. (NOTE: Gin-update sang PHIVOLCS ang ila record kagab-i.

Sa una nga report kaina halin man sa Phivolcs, nakabutang nga San Jose, Antique ang epicenter sang una nga pagtay-ug; Sibunag, Guimaras sa ikaduha nga linog kag Guimbal, Iloilo sa ikatatlo nga pagtay-ug.)

Magnitude 3.9 nga linog ang na-record sang las-7:45AM; magnitude 4.4 sang las-7:46AM; kag magnitude 4.8 sang las-10:54AM.

Separado ang mga pagtay-og kag indi aftershocks ang nabatyagan.

Tectonic suno kay Antioquia ang origin sang linog. Naghulag suno sa iya ang West Panay Fault nga halin sa Macato, Aklan padulong sa San Joaquin.

Apektado man sang linog ang pila ka banwa sa Capiz. (JoMaque)