Construction worker, patay sang gintiro sang riding-in-tandem sa Mandurriao

Iloilo City–Patay sang gindala sa Western Visayas Medical Center ang construction worker nga gintiro sang ginapatihan riding-in-tandem sa Megaworld area sa Taft North, Mandurriao, pasado las-singko kaina sang hapon, Nobyembre 7.

Suno kay SPO3 Rex Tabuada sang Mandurriao Police Station, madamo nga pilas sa ulo ang naagom ni Marvin Vasquez, 34 anyos sang Bakhaw, Mandurriao.

Nagaguwa sa imbestigasyon nga nagapungko sa kilid sang karsada si Vasquez kag nagahulat sang iya sweldo sang ginpundohan sang riding-in-tandem kag gintiro.

Sa pagpangusisa sa mga testigo, anum ka lupok ang ila nabatian antes nakit-an nga nagahuray-ad ang biktima. Suno kay Tabuada, anum ka empty shells ang ila na-recover sa crime.

Sa interview sang Aksyon Radyo sa abyan sang biktima, ginpahayag niya nga involved sadto sa illegal drug activities si Vasquez apang nagbag-o na.

Si Vasquez ang nagatrabaho sa isa sa mga ginakay-o nga buildings sa Megaworld. (AGB/AS)