No privatization, no displaced workers sa redevelopment sang Iloilo Central Market – City Administrator Atty. Galvez

Iloilo City – Ini ang ginpasalig ni City Administrator Atty. Hernando Galvez kasunod sang pagduso sa masobra P800-million nga redevelopment sa Iloilo Central Market.

Dugang ni Galvez, wala man sang mga vendors nga ma-displace ukon madulaan sang palangabuhian kun madayon ang proyekto. Dugang niya, hatagan sang lugar ang mga transient vendors sa sulod sang itukod nga merkado.

Ang redevelopment suno sa iya, sabat sang city government sa madugay na nga mga problema sa mga merkado sa syudad kasubong sang kakulang sa parking space, problema sa drainage system, supply sang tubig kag iban pa.

MAY PONDO?

Ang plano ang ginabug-usan sang lima ka mga phases suno kay Galvez;

1.) Restoration sang Heritage Building, pagtukod sang bag-o nga karsada halin sa Guanco Street tubtob sa Aldeguer Street;

2.) Pagtukod sang 6-level car park building;

3.) Pagtukod sang Government Corporate Center (ground floor para sa merkado, 2nd floor sa mga government offices);

4.) Pagtukod sang eatery, flower section kag dome;

5.) Expansion project ( Business Process Outsourcing)

Kuhaon ang pondo sa Phases 1 kag 2 sa Supplemental Budget suno kay Galvez samtang sa mga government offices naman kasubong sang Department of Public Works and Highways, Department of Tourism kag Department of Trade and Industry.

Natalana istoryahon sang representante sang city government ang nagkalain-lain nga cluster sa Central Market para ma-finalize ang redevelopment plan antes magtakop ang tuig.

‘NAGPAMATOK’

Ginbalabagan sang Association of Stall Owners and Transient Vendors of Iloilo City Public Market (ASTRAVEN) ang ginaproponer nga Iloilo Central Market redevelopment plan sang city government.

Suno kay Mr. Rex Donasco, presidente sang amo nga asosasyon, mas ginhatagan prayoridad sang amo nga plano ang pagtukod sang park kag building nga may helipad ipaanggid sa mga transient vendors.

Ginakabalak-an man ni Donasco kun sa diin mabaligya ang mga vendors samtang gina-obra ang bag-o nga merkado nga ginapa-abot magalawig sang tatlo ka tuig.

Dugang niya, wala man ginpresentar sa dayalogo kahapon, November 5, ang itsura kag ang sitwasyon sang mga baligyaan.

Nagapanawagan si Donasco nga unahon kay-o ang drainage system sa Central Market. (JoMaque)