Secretary General sang National Union of Peoples’ Lawyers-Negros kag isa sa mga abogado sang Sagay 9, gintiro patay sang riding-in-tandem

Negros Occidental–Patay ang Secretary General sang National Union of Peoples’ Lawyer-Negros matapos ginluthang sang riding-in-tandem nga naka-helmet sa Rojas Street, Barangay 5, Kabankalan City las 10:28 kagab-i, Nobyembre 6.

Ginkilala ang biktima kay Atty. Benjamin Ramos, 56 anyos sang Brgy. Biniquil sang nasambit nga syudad. Ginhingagaw pa dala sa Holy Mother of  Mercy Hospital si Ramos apang gin-deklarar nga napatay.

Suno kay Chief Inspector Rey Molas, Deputy Chief of Police sang Kabankalan City Police Station, papauli na si Ramos halin sa balay sang iya abyan sang ginpalapitan  sang mga suspek kag gintiro. Suno naman sa mga testigo, gintuyo pa ni Ramos nga magbatu sa mga suspek apang liwat siya nga ginluthang.

Sa inisyal nga report sang mga pulis, may apat ka pilas sang pagkatiro si Ramos, duha dire ang nag-igo sa iya dughan. Na-recover sa crime scene ang pila ka baseyo sang ginapatihan .45 caliber pistol kag .9mm.

Si Ramos ang isa sa mga abogado sang siyam ka sakada nga gin-masaker sa Sagay City. (AGB)