(UPDATE) Asawa, nagapabilin nga preso sa Molo Police Station matapos ginbuno ang iya bana kag ginpahayag kerida; anak sang mag-asawa, nagsaysay nga tatlo ka bulan sila nga ginpabay-an sang ila amay
Iloilo City–Tatlo na ka bulan nga wala ginasustentuhan kag ginapabay-an sang bana ang iya pamilya bangud sa ginpahayag pagpakigrelasyon sa iban nga babaye.
Ini ang ginsugid ni alyas Nonoy, 18-anyos kag ikaduha nga bata nanday alyas Lyn kag Rico, kasunod sang insidente sa diin nabun-an sang iya iloy ang ila amay kag ginapatihan kerida sa Molo kagab-i (Nobyembre 6)
Sa pagkahibalo ni Nonoy, wala man sang problema ang iya ginikanan apang gulpi lang nagbag-o ang iya amay.
Nagapangakig suno kay Nonoy ang iya amay kon magpangayo sila sang kuwarta para sa eskuwelahan.
Ginbuyagyag ni Nonoy nga siya ang una nga nakakita nga nagapakighilawas ang iya amay kag ginapatihan kerida nga si alyas Rina sang nagligad nga bulan.
Ginsugid niya ang insidente sa iya iloy apang naareglo ang gamu.
Naga-obra man si Nonoy sa balay nga gina-obrahan sang iya amay kag ni Rina.
Ginpahayag ni Nonoy nga magluwas sa iya amay, may duha pa ka lalaki nga nakarelasyon si Rina.
Kagab-i, mangayo kuntani sang kwarta sa ila amay sanday Nonoy upod ang iya manghod kag iloy sang gulpi lang siya ginwara-wara ni Rina, ginkuga kag ginlampusan sang silhig.
Wala nakapugong si Nonoy gani napatup-an niya si Rina apang gin-apinan pa suno sa iya sang ila amay ang babaye kag ginsumbag sila sang iya manghod.
Nagkuha sang ballpen ang iya iloy sang nakita ang pagsumbag kag ginbuno si Rina kag ang iya amay.
Wala na sang plano nga batunon pa sang iya pamilya ang bana matapos niya ginpili ang iya ginapatihan kerida.
Nagapabilin nga preso sa Molo Police Station sanday Nonoy kag alyas Lyn samtang gin-custody sang WCPD ang 16-anyos niya nga manghod. (AGB/JGM)