City government, posible mag-loan para sa ginaduso nga P866-million Iloilo Central Market Redevelopment Plan — Mayor Joe Espinosa

Iloilo City — Ginkunfirmar ni Mayor Joe Espinosa nga posible mag-loan ang city government para ipondo sa masobra P866-million nga redevelopment plan sa Iloilo Central Market.

Suno kay Espinosa, indi kasarang ang income sang syudad sa pagpondo sang amo nga proyekto.

Wala pa natul-id kun pila ang kabug-usan nga hulamon kag kun sa diin mahulam ang city government sa pagduso sang redevelopment plan.

Sa interview sang Aksyon Radyo sa alkalde, iya ginpahayag nga “Tanawon ta anay ang budget natun, kay bal-an mo ang atun nga regular budget, dyutay lang gid na ang ma-allocate natun sa projects, dyutay. Usually nagakuha kita sang dalagko kun sa development fund ukon naga-loan kita. So mga projects like that, basi potential nga may loan component ina kay kun mga projects nga dalagko, indi kita kasarang sa income sang syudad nga regular.”

SA DIIN GIN MAN BALA?

Ang pahayag ni Espinosa, wala nagasanto sa pahayag ni City Administrator Atty. Hernando Galvez.

Una na ginpahayag sang administrador nga ipaagi sa supplemental budget ang P70 tubtob P80-Million nga kinahanglan para sa Phases 1 kag 2 sang amo nga proyekto.

Hingyuon naman sa nagkalain-lain nga mga ahensiya sang gobyerno kasubong sang DPWH, DOT kag DTI ang kulang nga pondo sa proyekto.

‘OKAY’

Ginpaboran naman sang alkalde ang ginaduso sang city council nga pagre-allocate niya sang P85-Million para sa pagpakay-o sang mga merkado kag slaughterhouse sa syudad.

Ini kuntani ang Supplemental Budget Number 3 ni Espinosa para sa embankment sang iya ginaduso nga Sports Arena kag pagpatindog sang dugang nga mga opisina sa city government apang ginbalabagan sang city council.

Suno sa alkalde, lantawon pa niya ang resolution sang city council nga ginpasar sa session kahapon, Nobyembre 6, nga i-reallocate ang budget.

Ginpabutyag ni Espinosa nga luyag niya nga ipakay-o una ang Iloilo Central Market. (JoMaque)