Former Sara Mayor Neptali Salcedo kag 3 pa, ginkasuhan kasunod sang one time, big time police operation

Iloilo–Napasakaan na sang kaso si former Sara Mayor Neptali “Tali” Salcedo kag tatlo ka iban pa may kaangtanan sa one time, big time operation sang kapulisan sang Oktubre 17.

Ginkumpirmar ni Iloilo Police Provincial Office Director PSSUPT Marlon Tayaba nga gin-file  ang kaso sang Lunes kag Martes. Kaso nga illegal possession of firearms and ammunition kag illegal possession of explosives ang gin-file batuk sa anay alkalde; utod niya nga si Noel Salcedo sang Brgy. Salcedo, Sara; bata nga si Nixon Salcedo sang Brgy. Nagsulang, Lemery kag Frank George “Jojo” Sanson sang Brgy. Cano-an, Estancia. Kasunod ini sang na-recover nga mga armas kag bala sa ila balay sang ginserbe ang search warrants.

Dugang nga kaso may kaangtanan sa illegal nga druga ang gin-file kay Sanson matapos na-recover ang mga suspected shabu sa iya balay.

Lunsay nakapalagyo sa operation ang mga subjects.

Gin-athag ni Tayaba nga initial pa lang ang mga kaso nga ila gin-file bangud may ginahulat pa sila nga resulta sang forensic examination halin sa crime laboratory.

Padayon man ginatun-an sang ila abogado kon anu nga kaso ang ipasaka kay incumbent Sara Mayor Ermelita Salcedo base man sa mga ebidensya nga ila gina-uyatan.

Madumduman nga napatay sa operation si dismissed SPO4 Ricky Ssalcedo kag hinablos niya nga si Nixon “TJ” Salcedo Jr sang ginpahayag nagbatu sa police operatives. (AGB)