Pamilya Salcedo, may tatlo ka gin-ayo sa PRO6 – PRO6 Spox
Kampo Delgado – Tatlo ka bagay ang gin-ayu ni Sara Mayor Ermilita Salcedo kay Police Regional Office 6 Director John Bulalacao.
Ini matapos nga nagpadulong si Salcedo sa opisina ni Bulalacao sang Lunes, Nobyembre 5.
Suno kay PRO6 Spokesperson PSUPT Joem Malong, lakip sa gin-ayu sang alkalde nga hatagan sila sang security bangud ginpahayag nga nakabaton sila sang pamahog sa kabuhi.
Nag-ayu man sila nga buligan nga mabalik ang ila normal nga pangabuhi matapos ang one time big time police operation sang Oktubre 17 nga ginkapatay sang duha ka miyembro sang ila pamilya.
Ikatlo nga gin-ayu sang alkalde nga i-relieve si Senior Inspector Ascension Ortizo, hepe sang Sara Police Station, bangud suno kay Salcedo, nangin ‘bias’ ini sa iya katungdanan.
Nagpasalig si Bulalacao suno kay Malong nga i-assess sang PRO6 ang request sang pamilya Salcedo.
GINPANGINWALA NI BOARD MEMBER JENEDA SALCEDO ORENDAIN ANG REQUEST NGA PAGPA-RELIEVE KAY ORTIZO
Ginpanginwala ni Fifth District Board Member Jeneda Salcedo-Orendain nga nag-request ang ila pamilya nga i-relieve bilang hepe sang Sara Police Station si Ortizo.
Suno sa opisyal, nagpadulong lang sila sa opisina sang Regional Director bangud nakabaton sila sang pamahog. Seguridad lang sa ila kabuhi ang ginpangayu nila kay Bulalacao.
‘MALAYO SA PATAD ANG PAMAHOG SA PAMILYA SALCEDO’ – PSI ORTIZO
Malayo nga may mabaton nga pamahog ang pamilya Salcedo sa Sara.
Suno kay Senior Inspector Ortizo, wala sila sang report nga nabaton nga may pamahog sa pamilya.
Malayo ini suno sa iya nga matabu bangud hayag man nga ginakahadlokan sang publiko ang pamilya.
‘SATISFIED AKO SA PERFORMANCE NI ORTIZO’ – BULALACAO
Wala sa subong sang makita nga rason ang Regional Director sang PRO6 agud i-relieve bilang hepe sang Sara Police Station si Ortizo.
Suno kay Bulalacao, nagatuman si Ortizo sang iya katungdanan kag sa pagkamatuod satisfied ini sa performance sang hepe.
Nagpasalig si Bulalacao nga nakahanda ini magsuporta kay Ortizo bangud ginpahayag nga nakabaton sang pamahog ang hepe. (JoMaque)