Pulis sa Alimodian, naospital matapos gintiro; barangay kagawad nga suspek, natiruhan man sang nagresponder nga SWAT team
Iloilo–Pilason si PO3 Jonathan Guzman, 43 kag assign sa Alimodian MPS, sang gintiro sa Pianda-an Norte, Alimodian mga alas-2 kaina sang hapon, Nobyembre 9.
May pilas sa hawak si Guzman kag estable na sa ospital.
Nakilala sang pulis ang nagtiro suno kay Inspector Danilo noca, hepe sang Alimodian MPS, gani nga naghimo sang hot pursuit operation sa Piandaan East, Maasin sa diin ginpahayag nga nagpadulong ang suspek nga gin-identify kay Pianda-an Norte, Alimodian Barangay Kagawad Richel Misare, 38.
Nag-responder man ang SWAT sang may impormasyon nga may granada kag armas ang suspek. Natiruhan sang SWAT team si Misare nga naigo sa dughan. As of 5pm, indi pa mapalapitan sang mga pulis ang lawas bangud ginahulat pa ang taga-Explosive and Ordnance Division (EOD).
Ginsaysay ni Inspector Noca nga may mga reklamo batuk kay Misare nga nagapakawal kag nagapalupok sang pusil gani nga gina-surveillance agud nga maka-apply ang police sang search warrant.
Indi naman magpati ang pamilya ni Misare nga may pusil kag granada ang kagawad. (AGB/NG)