(UPDATE) Presidente sang ASTRAVEN, nag-athag nga indi matuod nga wala sila nagapabor sa redevelopment sang Iloilo Central Market; simple kag indi tuman ka daku nga gasto, gina-ayu sang grupo

Iloilo City–Indi matuod nga indi pabor ang Association of Stall Owners and Transient Vendors (ASTRAVEN) sa redevelopment plan sang Central Market.

Sabat ini ni ASTRAVEN President Rex Donasco sa impormasyon nga nagapamatok siya sa pagkaayo sang merkado.

Suno sa iya, pabor sila nga mga vendors sa pagpatahum sang merkado apang indi lang masyado ka grandioso base sa ginpresentar nga plano ni Mayor Joe Espinosa. Gintumod ni Donasco ang pagbutang sang helipad, parking space kag park sa Central Market.

Ginkuwestyun niya kon ngaa gastuhan gid sang dako ang plano sa diin kinahanglan man lang sang merkado ang pagkaayo kag pagpapinta.

Magluwas sini, wala man maplastar sa ila kon diin sila i-relocate samtang gina-obra ang merkado.

Wala pa suno sa iya ginpasigurado sa ila sang syudad nga makabalik sila sa ila puwesto sa tion nga matapos ang pagkaayo sang merkado. (AGB)