Philippine Army, nanindugan nga wala sang casualties ukon nasamaran sa ila grupo kasunod sang ila engkuwentro batuk sa NPA sa Igbaras

Iloilo — Wala sang nasamaran nga soldado sa engkwentro batuk sa ginapatihan mga rebelde nga New People’s Army sa Sitio Butuan, Barangay Igcabugao, Igbaras kahapon, Nobyembre 12.

Ginpasiguro ini ni Lieutenant Colonel Sisenando Magbalor Jr, commanding officer sang 61^st Infantry Battalion sang Philippine Army.Suno kay Magbalot, indi matuod ang ginapaguwa sang NPA nga may napilasan ukon napatay sa mga tropa.

Nagapadayon ang combat operations suno kay Magbalot bangud nagapati sila nga may mga pilason sa ila nga naka-engkwentro magluwas pa sa isa ka napatay nga nakita sa ginahimo nga clearing operations. Una na ginpahayag ni Magbalot nga wala pa nakilala ang bangkay sang lalaki nga nakita sa encounter site pero dal-on nila sa town proper agud mapa-identify kag mabalik sa iya pamilya.

Sa Facebook page sang Napoleon Tumagtang Command sang NPA-Southern Panay, ila gin-ako nga sila ang naga-engkwentro sang mga soldado. Gina-claim man sang NPA nga may apat ka napatay sa mga soldado.

‘Ginhimo nga war zone’

Nahimo nga war zone ang Barangay Igcabugao, Igbaras. Reaksyon ini ni Punong Barangay German Ello kasunod sang engkwentro sa tunga sang ginapatihan mga rebelde nga New People’s Army kag mga soldado

Mapatawag sang emergency session si Ello agud desisyunan kon ano ang ila himuon pero ginpa-unahan na niya ka panugyan ang mga residente nga indi maguwa sa barangay sugod alas-6 sa gab-i agud makalikaw sa insidente. Makaluluoy man suno kay Ello ang ila mga mangunguma bangud apektado ang palangabuhian. May lima ka balay sa Sitio Butuan sa diin natabu ang engkwentro.

Napuhag man ang mga pumuluyo sa Barangay Passi sang nabatian ang asud-asod nga linupok. Ang Barangay Passi, ginabanta walo ka kilometro ang kalayuon halin sa Barangay Igcabugao. (JoMaque)