Councilor Joshua Alim, luyag ma-istorya si Presidente Rodrigo Duterte angut sa mga reklamo sa PECO

Iloilo City–Luyag ni Councilor Joshua Alim nga makigkita kag ma-istorya si Presidente Rodrigo Duterte agud iya masugid ang nagakatabu sa syudad may kaangtanan sa mga reklamo batuk sa Panay Electric Company (PECO).

Kasunod ini sang pahayag ni Duterte sang damlag lang nga luyag niya hibaluon ang nagakatabu sa syudad. Nagapati si Alim nga nakalab-ot na sa presidente ang mga reklamo batuk sa PECO kag posible luyag niya mahibaluan kon may kamatuoran.

May mga tawo si Duterte suno kay Alim nga makasugid sang matuod nga sitwasyon sang syudad magluwas lang kon ginpunggan suno sa iya sang PECO.

Ginhinambit pa ni Alim ang ginpahayag nga paglibot sang taga-PECO sa mga barangay agud magpapirma sang manifesto bilang suporta sa ila.

Ginpahibalo ni Alim nga may pagahimuon siya nga lihok apang indi pa niya mabuyagyag agud indi siya maunahan sang PECO. (AGB)