Iloilo City (UPDATE) – Nanindugan si PSI Kennith Bermejo, head sang Regional Drug Enforcement Unit, nga lehitimo ang ila drug buy bust operation sa Grade 12 student sa Tabucan, Mandurriao kaina sang kaagahon, Nobyembre 14.

Pilason ang subject nga si Jessie Fama, 18 sang Sambag, Jaro kag Grade 12 student sa pribado nga eskwelahan sa syudad, kag iya upod nga si Daniel Balmes, 18 sang Zarraga. May pilas si Fama sa dughan kag may pilas sa baba si Balmes kag padayon nga ginabulong sa ospital.

Ginpahayag ni Bermejo nga upod ang duha sa Starex nga itom sang nagdaw-anay sang ginapatihan marijuana apang may nabatian nga linukpanay.

Suno kay Bermejo, lakip sa ila na-recover ang 45 cal. pistol kag 38 cal. revolver.

Duha ka bulan na nga gina-monitor sang RDEU operatives ang duha nga nagabaligya sang ginapatihan marijuana sa ila kapareho nga mga estudyante suno kay Bermejo apang indi pa nila matumod ang source. (JoMaque)