Mga pumuluyo sang siyudad, makabentaha kon ma-aprubahan ang franchise sang Prime Water suno kay Councilor Nava

Makabentaha ang mga pumuluyo sa Iloilo City kon maaprubahan ang franchise application sang Prime Water.

Ini ang pahayag ni Councilor Plaridel Nava, chairman sang Committee on Public Utilities sa City Council kon basehan ang general proposal sang Prime Water nga ginapanag-iyahan sang Villar group.

Kon basehan suno sa iya ang general proposal, nagpasalig sila nga masarangan nila nga mag-suplay sang tubig sa 180 ka barangay sa siyudad.

Indi lipod suno sa konsehal nga may mga lugar sa siyudad nga wala sang koneksiyon sang Metro Iloilo Water District ukon MIWD.

Suno kay Nava, maid-id niya nga ginatun-an ang franchise application sang kompaniya.

Madamo sila suno sa iya sang ginakunsiderar antes ang pagpaguwa sang desisyon.

Pananglitan suno sa iya, i-reject ang franchise application sang Prime water, indi nila mapat-od kun masusteniran gid man sang MIWD ang water distribution.

Ginpasumiter sang konsehal sang position letter ang MIWD kag Prime Water agud may basehan sa pagpaguwa sang desisyon.

Samtang, wala naman nauyunan ni Councilor Plaridel Nava, chairman sang Commitee on Public Utilities sa City Council ang ginhimo sang Prime Water sang Villar group nga ginlakip sa ila franchise application ang ila draft ordinance kag MOA.

Luyag sang Prime Water nga mag-establisar sang kaugalingon nga water system sa bilog nga syudad pareho sang Metro Iloilo Water District.

Paathag ni Nava dapat ang City Council ang mabalay sang ordinansa kag ini ang sundon kun aprubahan ang ila application.

Ginpaagi sa Office of the Mayor ang application sang Prime Water suno kay Nava kag nakibot siya bangud may nalakip nga draft ordinance kag MOA.

Kon basehan ang draft ordinance sang Prime Water suno kay Nava, 80% sang kaundan ang gin-ilog sa ordinansa nga gin-grant sa South Balibago Water Resources kag 20% lang sa probisyon ang ila ginbag-o.

Nagapakita suno sa konsehal ang ginhimo sang Prime Water nga kumpyansa sila nga maaprubahan ang ila application.

Sa pagkadumdom ni Nava, una pa lang ini nga natabu nga nagsumiter sang draft ordinance ang franchise applicant.

Gin-aku man sang opisyal nga gin-reject niya ang MOA.