Pagdesisyon sa franchise application sa Prime Water agud mangin water distributor sa Iloilo City, ginatun-an nanday Councilors Alim kag Nava
Iloilo City (UPDATE) – Patas nga desisyon ang paguwaon nanday Councilors Joshua Alim kag Plaridel Nava sa franchise application sang Prime Water nga ginapanag-iyahan sang Villar group agud mangin water distributor sa siyudad.
Suno kay Alim, ginatun-an nila ang kaundan sang franchise application sang Prime Water bangud daku ang epekto sa mga pumuluyo sang ila ipaguwa nga desisyon.
Maathag sa City Council suno kay Alim nga nagapamatok ang mga konsehal nga identified kay Congressman Jerry Treñas sa franchise application samtang pabor naman ang mga identified kay Mayor Joe Espinosa.
Gin-aku sang konsehal nga ang ila desisyon ni Nava ang basehan sa mangin kapalaran sang Prime Water. Nagpahayag man ini nga pareho nga desisyon ang ila ipaguwa ni Nava.
Madamo sila sang anggulo nga ginatan-aw sa franchise application sang Prime Water bangud bentaha sa mga pumuluyo ang ila general proposal. Apang mas mataas ang ila rate kun ikumparar sa Metro Iloilo Water District (MIWD).
Luyag sang Prime Water nga mag-establisar sang kaugalingon nga water system sa bilog nga syudad pareho sang (MIWD).
Basehan man ni Alim ang position letter nga isumiter sang Prime Water kag MIWD matapos ginpasumiter ni Nava, chairman sang Committee on Public Utilities sa City Council. (JoMaque)