Plano sang PNP Chief nga magsulat sa MTRCB angut sa teleserye nga “Ang Probinsyano,” suportado sang PRO 6
Iloilo City–Suportado sang Police Regional Office (PRO) 6 ang plano ni PNP Chief Director General Oscar Albayalde nga magsulat sa MTRCB may kaangtanan sa teleserye nga “FPJs Ang Probinsiyano.”
Suno kay PRO 6 Spokesperson Supt Joem Malong, indi maayo nga impresyon sa ila organisasyon ang ginapakita nga mga eksena sa teleserye ilabe na sa PNP chief.
Bangud sini nangin malain man suno kay Malong ang panulok sang tumalan-aw sa mga police.
Bisan fiction ukon bungang isip lang ang programa, imporsible suno kay Malong nga indi maapektuhan ang ila organisasyon bangud ginagamit dire ang uniporme sang mga pulis.
Gin-athag ni Malong nga wala sang problema ang paggamit sang uniporme sang pulis sa teleserye pero dapat nga i-regulate ini.
Gin-ako man ni Malong nga wala na sila nanamian sa storyline sang “Ang Probinsiyano” bangud mismo mga bata malain na ang pagtulok sa mga pulis.
Suno kay Malong, apektado ang kapulisan bangud sa negatibo nga portrayal sa mga pulis. (JoMaque)