Bangkay sang babaye nga ginpahayag may diperensya sa paminsaron, nasapwan sa higad sang suba sa San Dionisio
San Dionisio, Iloilo – Patay na sang nasapwan ang babaye nga ginpahayag may diperensiya sa paminsaron sa higad sang suba sa Barangay Tamangi, pasado las-6 kaina sang aga, Nobyembre 17.
Nasapwan nga patay kag wala na sang idalom nga panapton si Chrisna Rodrigo, 21 anyos sang Barangay Talo-ato.
Suno kay Tamangi Barangay Kagawad April Granja, may pilas sa guya ang babaye kag puno sang lutak ang iya lawas.
Katapusan nga nakit-an suno sa iya si Rodrigo kahapon (Nobyembre 16) nga nagalakat-lakat sa talipapa sang Barangay Bagacay antes nasapwan ang bangkay kaina.
Suno sa San Dionisio Police, indi nila matul-id kun gin-abusuhan sexual ang babaye bangud wala man nakitaan sang patimaan.
I-autopsy ang bangkay ni Rodrigo agud mahibaluan ang gintunaan sang iya kamatayon kag kun ginhimuslan gid man siya. (JoMaque)