Age bracket nga nagapaidalum sa HIV test, nagnubo – FPOP
Iloilo City — Nagnubo ang age bracket sang mga nagapa-test sa Human Immuno Deficiency Virus ukon HIV suno sa Family Planning Organization of the Philippines ukon FPOP-Iloilo.
Suno kay Nurse Chris Vladimir Homena sang amo nga organisasyon, naga-edad 25 tubtob 30 anyos ang masami nga nagapaidalum sa HIV test sa ila opisina tatlo ka tuig ang nakaligad apang nahimo na ini nga 14 tubtob 25-anyos sa subong.
Base sa pinaka-ulihi nga data sang FPOP – Iloilo, naglab-ot na sa 719 ang narecord nga mga kaso sang HIV sa syudad samtang 547 naman sa probinsya.
Nagapati si Nurse Homena nga may kaangtanan sa accesability kag availability sang serbisyo kag programa sang gobyerno kag mga Non Governmental Organizations ang pagtaas sang narecord nga mga kaso sang HIV kag pagnubo sang age bracket sang mga nagapaidalum sa HIV test.
Positibo man si Nurse Homena sa pihak sang pagtaas sang narecord nga mga kaso bangud ginpahayag mas madamo ang mabulong kag masalbar ang kabuhi.
‘MASS TESTING’
Gina-engganyo sang FPOP – Iloilo ang tanan nga interesado nga magpaidalum sa libre nga HIV-test sa Nobyembre 24 angut sa pagsaulog sang World Aids Day.
Suno kay alyas Gary ,person living with HIV kag kabahin man sang FPOP-Iloilo, importante nga magpaidalum sa test agud mahibaluan ang status sang mga natungdan ilabi kun high risk sila sa HIV.
Nagpasalig si Gary nga confidential ang resulta sang test kag handa man sila nga magbulig kun positibo ang natungdan.
Mahimo magkadto ang mga interesado sa FPOP-Iloilo office sa Rizal Street, Brgy. Maria Clara, City Proper sugod 10:00 A.M. tubtob 6:00 P.M. (JoMaque)