Pagwangal ni PNP Chief Oscar Albayalde angut sa negatibo nga paglaragway sa pulis sa teleserye, late reaction na suno sa eksperto
Iloilo City — Tuman na ka ulihi ang pagreact ni PNP chief Director General Oscar Albayalde sa negatibo nga paglaragway sa mga pulis sa teleserye.
Ini suno kay Dr. Zoilo Andrada Jr, eksperto sa Developmental Communication halin sa Division of Humanities, University of the Philippines Visayas.
Suno kay Dr. Andrada, madugay na nga ginalaragway sa media ang mga malain nga obra sang pila ka mga pulis.
Dugang niya, indi man ini limitado sa Pilipinas bangud nagakatabo man ini sa iban nga pungsod kasubong sa America.
Ginpahayag ni Dr. Andrada nga bisan ginkuha ang inspirasyon sang mga drama sa matuod tuod nga mga hitabo sa sosyodad, kabahin lang ini sa entertainment nga papel sang media.
‘ARTISTIC THINKING’
Nanindugan man si Dr. Andrada nga indi dapat pag-iregulate sang gobyerno ang representasyon sang media ( subject sa mga guidelines sang mga organisasyon sang media outlets).
May kinamatarong ang tanan sa pag-express ukon pagpabutyag sang sentimiento suno kay Dr. Andrada.
Dugang niya, ang pagrepresentar sa mga pulis sa TV drama ang produkto sang artistic thinking sang mga writers kag ang katuyuan amo ang pag-entertinar sa mga audience. (JoMaque)