Councilor Plaridel nava, nagpamalibad nga maghatag sang posisyon sa plano ni Mayor Espinosa nga magtukod sang command center

Iloilo City — Nagpamalibad nga maghatag sang posisyon si city council floor leader Plaridel Nava sa plano pagtukod ni Mayor Joe Espinosa sang command center paagi sa iya Supplemental Budget number 4.

Suno sa konsehal, hulaton niya nga makalab-ot sa konseho ang kaundan sang supplemental budget sang alkalde antes maghimo sang panindugan.

Una na ginpahayag ni City Administrator Atty. Hernando Galvez nga lakip ang pagtukod sang command center sa prayoridad ni Mayor Espinosa nga mga proyekto paagi sa iya supplemental budget.

Sang damlag lang, nagpasar sang resolution ang city council nga nagahingyo kay Espinosa sa pagre-allocate sang P85-million nga para kuntani sa pagtukod sang Sports Arena kag bag-o nga building sa pagpakay-o sang mga merkado kag slaughterhouse sa syudad.

‘AS IS’

Ginpabutyag ni Councilor Armand Parcon nga amo sa gihapon ang panindugan sang city council angut sa P85-million nga supplemental budget sang alkalde.

Suno kay Parcon, nga amo ang nagduso sa city council sang natungdan nga resolution, lantawon man niya kun ano ang kaundan sang supplemental budget sang alkalde.

Una na ginpahayag ni Public Safety and Transportation Management Office head Jeck Conlu nga kabahin ang command center sang bag-o nga building nga itukod sang city government angut sa ginaduso nga Advance Transportation Management and Security Surveilance System.

Ang ATMSS ang ginab-ugusan sang apat ka mga phases.

Suno kay Conlu, ginabanta P350- Million tubtob P400-Million ang Phase 1 pa lang sang proyekto. (JoMaque)