Retired nga pulis, patay sang gintiro sang riding-in-tandem sa Villa Anita, City Proper; napatay nga pulis, madugay na nga naangut sa illegal drug trade suno sa police official

Iloilo City–Patay ang retirado nga pulis sang gintiro sang riding-in-tandem sa Brgy. Villa Anita, City Proper las-otso kaina sang aga, Nobyembre 20.

Nagamaneho sang Nissan Urvan nga puti si retired SPO1 Ronaldo “Apol” Alag sang Mandurriao pakadtu sa balay sang iya magulang nga si anay Barangay Kapitan kag subong Barangay Kagawad Marcelo “Siloy” Alag sang gintiro siya sang riding-in-tandem.

Suno kay alyas Kik, nakasakay sa motorsiklo ang duha ka lalaki nga nakasuksok sang helmet sang gintiro sang makapila ka beses si Alag.

Nakadusmo pa suno kay Kik ang gunman samtang nagadalagan pakadtu sa motorsiklo pagkatapos ang krimen.

Gindala sa Iloilo Doctor’s Hospital si Alag apang gindeklarar nga dead-on-arrival.

‘Involved sa illegal drugs’

Madugay na nga may kaangtanan sa illegal nga druga si retired SPO1 Alag suno kay PSUPT Jonathan Pablito, hepe sang Police Station 1.

Suno kay Pablito, 2004 sang ginreport ang kaangtanan sang biktima kay the late PDEA identified drug group leader Melvin Odicta. Ginpahayag nga bagman, runner, security kag driver ni Odicta si Alag base sa inisyal nga impormasyon suno kay Pablito.

Wala sang holdings ang police kay Alag sugod sang 2015 angut sa illegal drug trade apang ginapatihan nalakip siya sa daan nga drug list suno pa kay Pablito. (AGB/ATT)