8 basiyo kag 6 slug nga compatible sa .45 caliber, na-recover sa crime scene sa pagtiro-patay sa retired police sa City Proper

City Proper, Iloilo City (UPDATE) – Walo ka basiyo kag anum ka slug nga compatible sa .45 caliber ang na-recover sang Scene of the Crime Operatives sa ginluntaran sang pagtiro-patay sa retired police sa Villa Anita, City Proper kaina sang aga, Nobyembre 20.

May multiple gunshot wounds si retired SPO1 Ronaldo ‘Apol’ Alag.

Suno kay Supt. Hilarion Roga sang SOCO, isa ka slug ang na-recover sa clutch sang salakyan, isa sa idalom sang driver seat, isa sa passenger seat, isa sa talapakan sang passenger seat sa front seat, isa ang nagpilit sa pwertahan sang passenger side sa front seat kag isa naman ka slug sa likod nga pulungkuan sa passenger seat.

Magluwas diri may na-recover man nga walo ka basiyo nga compatible sa .45 caliber. Naglain man suno sa iya ang position sang salakyan sang biktima bangud ini pa ang gingamit sa pagdala sa iya sa ospital. Makabulig man suno kay Roga ang kuha sang CCTV camera sa ila imbestigasyon.

Suno naman kay Villa Anita Barangay Kagawad Celoy Alag, magulang sang biktima, ginasundan nila nga motibo ang posible trabaho sadto sang iya manghod bilang police.

Wala man siya sang ihibalo natuhoy sa report nga konektado ang iya utod kay the late PDEA identified drug group leader Melvin Odicta.

Nagapati ang kagawad nga madugay na ginasundan ang iya utod kabangdanan na-pattern ang iya ruta. (JoMaque)