94% sang mga natapikan sang HIV sa Western Visayas, mga lalaki suno sa DOH; 99% sang mga HIV cases na-transmit paagi sa sex
Western Visayas – 94% ukon 2, 578 ka mga lalaki sa rehiyon ang natapikan sang Human Immunodeficiency Virus (HIV) halin 1986 tubtob Agosto subong nga tuig suno sa Department of Health 6.
Suno kay Dr. Elvie Villalobos, cluster head sang Infectious Diseases sa DOH 6, sa 2, 741 ka na-record nga HIV cases sa Western Visayas sa amo nga period, 6% lang ukon 162 ang mga babayi.
Base sa pinakaulihi nga report sang DOH, ang syudad sang Iloilo ang may pinakamadamo na-record nga kaso sang HIV sa rehiyon nga naglab-ot sa 719.
Ginsundan ini sang probinsya sang Iloilo nga may 547; Negros Occidental, 474; Bacolod City, 441; Capiz – 184; Aklan, 178; Antique – 143 kag Guimaras nga may 55.
99% sang na-record nga mga kaso sang HIV suno kay Dr. Villalobos ang paagi sa pagpakighilawas samtang 1% naman ang paagi sa mother to child kag iban pa nga wala mahibaluan nga mga kaso.
Mahimo ma-transmit ang HIV paagi sa seminal fluid, vaginal fluid, breast milk kag dugo.
‘MALE TO MALE’
Ginreport 80% sang mga natapikan sang HIV ang paagi sa pagpakighilawas sang lalaki sa kasubong nga lalaki ukon male having sex with male samtang 19% ang pagpakighilawas sang lalaki sa babayi.
50% sa percentage sang mga lalaki nga nagapakighilawas sa kasubong nga lalaki suno kay Dr. Villalobos ang mga homosexuals ukon agi samtang 30% naman ang bisexuals ukon nagapakighilawas sa lalaki kag babaye.
Sugod sang 2000, nangin trend nga ang mga natapikan sang HIV amo ang mga lalaki nga nagapakighilawas sa kasubong nga lalaki suno kay Dr. Villalobos.
‘SEXUALLY ACTIVE’
50% sang mga natapikan sang HIV ang naga-edad 25 tubtob 34-anyos.
Suno kay Dr. Villalobos, ang nasambit nga age bracket ang active sa sex rason risgo sila nga matapikan sang HIV.
28% naman sang mga natapikan ang 15 tubtob 24-anyos; 18%, 35 tubtob 49-anyos, 4% ang 50-anyos kag pasaka ang edad.
‘MAS AWARE’
Nagapati si Dr. Villalobos nga mas aware ukon nakahibalo na ang publiko angut sa HIV rason nagataas ang narecord nga mga kaso.
Dugang niya, mas accessible naman ang mga programa kag serbisyo angut diri rason mas madamo ang nagapa-HIV test.
Ginpa-athag ni Dr. Villalobos nga ang manubo nga kaso sang HIV nga na-record ang wala nagakahulugan nga wala na sang mga apektado sa lugar.
‘MAGPA-HIV TEST’
Gina-engganyo sang DOH kag Family Planning Organization of the Philippines – Iloilo ang publiko nga mag-avail sang libre nga HIV-test sa Nobyembre 24 angut sa World AIDS Day.
Importante nga magpa-test agud mahibaluan ang status kag gilayon nga mabuligan ang natungdan kun magpositibo.
Sa mga interesado, magkadto lang sa opisina sang FPOP-Iloilo sa Rizat Street, Barangay Maria Clara, City Proper halin 10:00 A.M. tubtob 6:00 P.M. sa Nobyembre 24. (JoMaque)