City DILG Director Ferdinand Panes, nagpa-athag nga chief executives sang ila barangay ang mga punong barangay; apang pahayag ni Liga president Irene Ong nga wala sang labot ang city Mayor sa barangay, indi naman ensakto suno kay Panes

Iloilo City–Nagpa-athag si Atty. Ferdinand Panes, City DILG director, sa pagtudlo sa ila ni Liga President kag ex-officio Councilor Ma. Irene Ong nga amo ang naghambal nga ang mga kapitan ang “presidente, mayor kag gobernador” sang barangay hall.

Suno kay Panes, kun may nahambal gid man ang taga-DILG parte diri sa mga training ukon seminars sang mga punong barangay, indi pareho sini ang contexto.

Paathag niya nga ginahatagan pagtamod gid sa mga opisyal nga sila, ilabe na ang mga kapitan, pareho sang mga mayors, amo ang chief executives sang ila barangay kag may nagapanguna sila nga responsibilidad pareho sang pagdumala sang barangay hall.

May kinamatarong man ang mga kapitan suno kay Panes nga maghibalo kun paano gamiton ang ila IRA fund lakip na ang paghibalo kun ano ang nagakabagay ibutang sa mga barangay halls pero ini tanan subject sa mga existing rules kag ordinansa.

Ginpahanumdom man ni Panes ang responsibilidad sang mga barangay officials nga magbutang sang full disclosure report nga nagalakip sang annual budget kag utilization sang IRA kag iban pa nga dapat mahibaluan sang publiko sa parte sang barangay hall nga makita sang tanan.

‘Indi tama’

Indi naman ‘tama’ suno kay Panes nga wala sang labot ang City Mayor sa mga barangay.

Ini ang reaksyon ni Panes sa pahayag ni Ex-Officio kag Liga President Ma. Irene Ong nga wala sang poder si Mayor Espinosa sa mga barangay halls. Kasunod man ini sang statement sang alkalde nga plano niya ipakakas ang campaign materials sang mga kandidato sa mga barangay halls.

Suno kay Panes, para sa public service ang mga barangay halls. (AGB)