Mga kapitan, ginpahayag nga ginapadala sang 20 tawo para mag-rally kadungan sa presentation sang MORE Electric and Power Corporation sa city council

ILOILO CITY — Nakabaton sang impormasyon si Councilor Joshua Alim nga may maga-rally batok sa More Electric and Power Corporation sa Lunes, Nobyembre 26, kadungan sa pagpresentar sang bag-o nga power distributor sa konseho.

Suno kay Alim, base sa iya impormasyon, ginapadala sang 20 ka tawo ang mga kapitan para nga bayaran sa pag-rally. Ginakabig ni Alim nga ‘desperate’ move ang nasambit nga akto.

Ginpahayag sang konsehal nga wala man sang problema nga mag-rally basta indi lang maka-istorbo sa discussion/ presentation sang MORE sa konseho. Apang suno sa iya, wala naman ini sang epekto bangud patay naman ang franchise application sang PECO sa Kongreso.

Dugang pa niya, may nag-interview sa iya kag nagapamangkot kun matuod ang ginahambal sang PECO nga nangin maayo na ang ila serbisyo kag wala na sang brownout nga nagakatabo. Indi pa madetalye sang konsehal ang nasambit nga interview apang suno sa iya, ginhambal lang niya nga padayon gihapon ang overbilling sang PECO.

Sa impormasyon naman nga nakuha sang Aksyon Radyo halin sa indi magpakilala nga kapitan, ang PECO mismo ang nagakadto sa barangay kag nagapangita sang tawo nga masuporta sa ila.

Ginatinguhaan sang Aksyon Radyo nga makuha ang statement sang PECO apang wala pa sang statement halin sa ila. (JoMaque)