(UPDATE) Iloilo City Congressman Jerry Treñas, nanindugan nga wala sang ginlapas ang ila pagtakud sang mga posters kag tarpaulins sa pampubliko nga mga lugar

Iloilo City–Nagapati si Lone District Congressman Jerry Treñas nga wala sang ginlapas ang ila grupo sa pagpanakod sang mga posters ukon tarpaulins sa mga pampubliko nga lugar.

Suno sa kongresista, wala man sang nabutang nga tinaga nga “vote” kag anuman nga posisyon sa mga ginapatapik nga tarpaulin gani indi ini makabig nga paglapas sa ordinansa sang syudad ukon laye. Ginapanindugan ni Treñas nga kabahin sang freedom of expression sang mga kapitan ang pagbutang sang campaign materials sang ila grupo.

Natingala si Treñas kun ngaa subong lang nagwangal si Mayor Joe Espinosa bangud ginhimo man nila ini sang 2013 kag 2016.

Ang diperensya lang suno sa iya nga upod pa sila sadtu sang alkalde.

Normal lang suno kay Treñas nga makita ang mga campaign materials sang mga kandidato bangud panahon ini para sa mga tawo nga magpakita kon sin-o ang ila ginasuportahan.

Una na ginpabutyag ni Mayor Espinosa nga sobra na ang pagpanakod sang posters ukon tarpaulin sa mga pampubliko nga lugar ilabe na sang grupo ni Treñas. (AGB)