Barangay kagawad, gintiro-patay sa New Lucena; Suspect, nakapalagyo

New Lucena, Iloilo – Patay si Wari-Wari, New Lucena Barangay Kagawad Marcelino Fornes, 46 anyos sang gintiro sang iya kasilingan sa ila lugar kagab-i, Nobyembre 24.

Suno kay PO3 Cosmeflor Marco, imbestigador sang New Lucena Police Station, suspect sa krimen si Bernie Palermo, 38-anyos nga residente man sang amu nga lugar.

Base sa ila imbestigasyon, nagbaisay sanday Marvin Fornes, utod sang napatay kag Ireneo Solacito, pakaisa sang suspect samtang yara sila sa birthday party sa balay ni Palermo.

Ginpahayag nga nagpatunga si Barangay Kagawad Fornes kag may natabu man nga komosyon sa tunga nila ni Solacito.

Pasulod na sa ila kudal ang barangay kagawad sang gintawag ni Palermo kag sang nagpalapit hinali lang siya nga gintiro.

Napilasan sa paa ang biktima kag dead-on-arrival sa ospital. Ginapatihan 12 gauge suno kay Marco ang gingamit sa krimen.

Padayon ang pag-ayam kay Palermo bangud nagpalagyo matapos ang krimen. (JoMaque)