Ex-Barangay Kapitan Gemma Calzado nga nalakip sa narco list ni Pres. Rodrigo Duterte, nadakpan sa drug buy bust operation sa Molo

Iloilo City — Dakup sa drug buy bust operation si anay Kasing-Kasing, Molo Punong Barangay kag subong barangay kagawad Gemma Calzado las 9 kahapon sang aga.

Ginhimo ang operation sang Regional Drug Enforcement Unit (RDEU) kag Molo police sa isa ka talyer nga ginatambayan ni Calzado sa amu man nga barangay.

Suno kay Senior Inspector Kennith Bermejo, team leader sang RDEU, nagpakuno-kuno nga poseur buyer ang pulis kag nagbakal kay Calzado sang isa ka sachet sang suspected shabu balor P1,200.

Narecover kay Calzado ang 8 ka sachets sang suspected shabu kag P1,400 pesos nga cash.

Nagbalibad naman nga magpa-interview si Calzado.

‘ODICTA DRUG GROUP’

Na-monitor sang RDEU nga mga remnants sang Odicta Drug Group ang nagadul-ong sang supply sang illegal drugs kay Calzado agud iya i-dispose.

Ginpahayag ni PSI Bermejo nga apat tubtub lima ka bulan nila nga gin-surveillance si Calzado nga nalakip sa narco list ni Presidente Rodrigo Duterte.

Na-monitor man nila nga on and off ang operation sang anay barangay kapitan.

Suno pa kay Bermejo, ginatudlo sang mga nadakpan nila nga drug personalities nga kay Calzado sila nagakuha sang supply.

Area of operation ni Calzado ang Molo district suno kay Bermejo.

Sa subong, gin-categorize sang RDEU nga high value target level 2 drug personality si Calzado.

‘PDEA LIST’

Si Calzado ang naga-isahanon nga barangay kapitan sa Iloilo City nga nalakip sa drug list nga ginpaguwa sang Philippine Drug Enforcement Agency (PDEA) sang Abril 30.

Nagpadulong pa si Calzado sa opisina sang PDEA 6 kasunod sang nabuyagyag nga listahan.

Suno kay Calzado, nakibot siya nga nalakip sa listahan bangud wala siya sang kapasidad nga mag-intra sa illegal nga druga. Ginpanginwala niya ang akusasyon nga drug protector siya. (JoMaque)