Mga opisyal sang MORE Electric and Power Corporation, nagpresentar sang ila mga programa sa City Council

Iloilo City–Nagpresentar ang MORE Electric and Power Corporation sang ila mga programa sa City Council kaina sang aga, Nobyembre 26.

Nagpanguna sa pagplastar sang ila mga programa kag nagsabat sa mga pamangkot sang mga konsehal si MORE President Rowell Castro. Isa sa mga gintutukan sa presentasyon ang promisa sang MORE nga magatanyag sila sang mas manubo nga electricity rate kon ikumparar sa rate subong sang Panay Electric Company.

Wala sang nahatag si Castro nga specific rate pero nagpasalig lang nga maganubo ang total electricity rate sang mga konsumidor.

Nagpasalig man ang MORE nga masarangan nila nga masolusyunan ang mga problema nga ginareklamo ang mga konsumedor sang PECO.

Suno kay Castro, bisan bag-o sila nga power distributor, nag-hire sila sang mga tawo nga may experience pareho ni Mr. Amador Guevarra nga anay general manager sang Pampanga Electric Cooperative III nga mas daku ang sakup kon ikumparar sa PECO. (AGB)