Solterito nga nabun-an sa Molo, napatay samtang ginabulong sa ospital

Molo, Iloilo City — Napatay samtang ginabulong sa ospital ang 15-anyos nga lalaki nga nabun-an sa East Baluarte, Molo, pasado las-10 kagab-i, Nobyembre 25.

Ginkumpirmar ni SPO3 Cesar Salcedo sang Molo Police Station nga gindeklarar patay si Alyas Kent sang Barangay Kasing-Kasing, pasado ala-una sang kaagahon (Nobyembre 26).

Suno kay Salcedo, may yara na sila sang pangalan sang mga suspetsado apang indi pa mahimo mabuyagyag.

Suno naman kay Alyas Nonoy, 16-anyos sang Calumpang kag abyan sang biktima, una siya nga ginlagas sang grupo sang mga menor-de-edad kabangdanan nga nagpalagyo siya padulong sa Barangay Kasing-Kasing.

Nakita siya ni Alyas Kent kag gindul-ong pauli. Sang nagalakat na sila nga duha, nakita sila sang grupo sang mga kabataan kag ginpalapitan.

Nakapalagyo siya samtang nabilin naman ang biktima kag ginpulihan sang mga suspetsado.

Indi magnubo sa apat ang pilas ni Alyas Kent. (JoMaque)