2 ka pulis nga wala nagpakita kag nagpa-athag sa gin-conduct nga accounting of personnel sang ICPO, pasakaan sang kaso administratibo

Iloilo City — Duha ka pulis ang pasakaan sang kaso administratibo sang Iloilo City Police Office (ICPO) matapos wala nagpakita kag nagpaathag kon ngaa absent sila sa accounting of personnel sang nagligad nga semana.

Ginkumpirmar ni ICPO Director Senior Supt. Martin Defensor Jr nga assigned sa Molo Police Station kag Mandurriao Police Station ang gintumod nga mga pulis.

Suno sa iya, ginhatagan pa niya sang tubtub Nobyembre 24 sang hapon ang duha ka pulis agud magpakita kag magpaathag apang wala gid nag-report.

Gin-athag ni Defensor nga off duty sadtu ang duha ka pulis sang gin-conduct ang accounting of personnel apang luyag niya lang nga makita agud maghatag sang dugang nga instructions.

Ulihi na suno sa iya kon magkadtu pa sa iya opisina kag magpaathag ang duha ka pulis matapos ginhatagan sang chansa.

Ginmanduan na ni Defensor ang ila investigation department nga i-file ang kaso batuk sa duha ka pulis. (JoMaque)