Simbahan katoliko sa Iloilo, nag-react sa panugyan ni Presidente Rodrigo Duterte sa mga Katoliko nga indi na magkadto sa simbahan agud magpangamuyo

Iloilo City–Ginabilin sang simbahan sa mga tumuluo ang pagdesisyon kon sundon ang pahayag ni Presidente Rodrigo Duterte sa mga Katoliko nga indi na magkadto sa simbahan kag sa baylo, magpahimo na lang sang chapel sa balay kag diri magpangamuyo.

Suno kay Monsignor Meliton Oso sang Jaro Archdiocesan Social Action Center, nakahibalo naman ang mga tumuluo kon ano ang ginatudlo sang simbahan Katoliko. Pero iya gin-athag nga base sa ginapatihan sang mga Katoliko, dapat nga magkadto gid sa simbahan kon Domingo agud maka-celebrate sang adlaw sang Ginoo bilang komunidad.

Angut naman sa limos nga ginapangayo sang simbahan, gin-athag ni Oso nga ginagamit ini sa galastuhan pareho sang bayad sa suga kag sakristan kag ginahatag sa mga imol. (AGB)