Contractor sang road project nga gintanuman sang mga pumuluyo sa Tigbauan, gin-blacklist sang DPWH
Municipality of Tigbauan — Gin-blacklist sang Department of Public Works and Highways ang contractor sang delayed road project nga makapila ka beses nga gintanuman sang mga pumuluyo sa Barangay 8, Tigbauan.
Base sa Department Order Number 163 series of 2018 ni DPWH Secretary Mark Villar sang Nobyembre 12, blacklisted ang Edison Development and Construction sa sulod sang isa ka tuig epektibo gilayon.
Ang pag-blacklist may kaangtanan sa gin-terminate nga kontrata sang Edison Development and Construction sa Dapa, Surigao del Norte sang Setyembre subong mga tuig.
Bilang resulta, ginadumilian ang nasambit nga contractor nga magpasakop sa anuman nga bidding sa anuman nga proyekto sang DPWH.
Ginkuhaan sang Aksyon Radyo Iloilo sang official statement ang Edison Development and Construction apang wala pa sila nakahatag sang pahayag.
‘LAIN NA’
Nadiskubrehan sa pagpangusisa sang Aksyon Radyo nga wala na sang Philippine Contractors Accreditation Board ukon PCAB license ang Edison Development and Construction.
Base sa November 19, 2018 nga datus halin sa Construction Industry Authority of the Philippines, nahimo na nga Edison Development and Construction Incorporated ang Edison Development and Construction.
‘ON-OFF MANPOWER’
Indi consistent ang mga workers sang Edison Development and Construction sa ila P24- Million contract sa Brgy. 8, Tigbauan suno kay Engr. Aaron Sepida, construction head sang DPWH- 1st District Engineering Office.
Suno kay Engr. Sepida, Agosto sang na-obserbahan nga “on-off” ang mga workers sang contractor.
Nagapati si Engr. Sepida nga nabudlayan ang contractor sa pag-stabilize sang ila mga workers bangud pangayaw sila.
Magluwas sa issue sa manpower, indi man manami ang tyempo rason na-delay sa pag-obra ang contractor suno kay Engr. Sepida.
Nagapadayon naman ang pag-obra sang Edison Development and Construction sa Tigbauan bisan ginpadal-an na sila sang Show Cause Order angut sa ila lampas 15% nga negative slippage ukon delay sa pag-obra.
Nagpasalig ang contractor nga solusyonan ang delay sa pag-obra suno kay Sepida. (JoMaque)