Pagbaha kon high tide nga naga-apekto sa mga taga San Pedro Molo, nasolusyunan na

Molo, Iloilo City – (UPDATE) Dako ang pagpasalamat ni Julie Somes bangud matapos ang masobra duha ka tuig nga pag-antos, nasolusyunan na ang pagbaha sa ila lugar kon magtaub nga nagahatag huol sa ila pagsinarayo sa Barangay San Pedro.

Nagpalab-ot sadto sa Aksyon Radyo Iloilo sang reklamo si Somes matapos nga wala gin-aksyonan sang city government kag sang ila baranagay ang iya una nga reklamo.

Ginreklamo niya ang naga-balik nga tubig kon mag-high tide halin sa Iloilo River nga naga-agi sa drainage kag nagakadto sa mga pamalay sa ila lugar.

Katapusan nga semana sang Oktubre sang ila nakita nga ginakay-o ang drainage kag sang nagligad lang nga semana natapos (Nobyembre 15 ukon 16).

Sang ginpamangkot nanday Somes ang mga naga obra, ila ginpahayag nga joint team sila sang City Government kag DPWH.

Ginbutangan sang kahoy ang baba sang drainage agud indi gilayon makasulod sa ila lugar ang bulyada sang tubig kon magtaub.

Sa subong, wala na nagabaha kon magtaas ang water level sa Iloilo River. (JoMaque)