Deadline sa substitution sang mga kandidato nga may partido para sa 2019 elections, nagtakup subong nga hapon; Comelec, nag-athag nga wala na sang extension

Iloilo–Nagtakup na ang deadline for substitution sang mga kandidato nga may partido nga mapadalagan sa 2019 midterm elections.

Tubtob las-5 kaina sang hapon lang, Nobyembre 29, ang deadline kag wala na sang extension suno sa Commission on Elections.

Sa probinsya, naghingagaw sa pag-withdraw sang iya kandidatura sa pagka-kongresista si incumbent First District Congressman Richard Garin. Una na nga nag-withdraw ang amay sang kongresista nga si Guimbal Mayor Oscar Garin nga nag-file man sang COC sa pagka-kongresista. Bangud sini, nabilin na lang nga magapadalagan sa pagka-kongresista ang iya asawa nga si anay Health Secretary Janette Garin kontra kay anay Miag-ao Mayor Gerardo Flores.

Kahapon, nag-withdraw si Jesus Palomo sang iya COC sa pagka-board member sang PDP Laban sa 4^th district kag nag-substitute sa iya si anay Board Member Shalene Palmares Hidalgo.

Sang Oktubre 23, nag-withdraw si Peter Anthony Velasco sang iya kandidatura sa pagka-kongresista sa third district sa idalum sang Nacionalista Party kag nag-substitue sa iya si BM Manny Gallar.

Sa Iloilo City, nag-withdraw sang ila COC sa pagka-konsehal sang Nacionalista Party sa linyada ni Mayor Joe Espinosa sanday Renan Gonzales, Joe Marie Barredo, Stephen Denaga, kag Ceasar Hablero. Nag-substitute sanday Rex Sarabia kag Tabucan, Mandurriao Punong Barangay Roland Montelibano. (AGB)