(UPDATE) Hepe sang Police Station 1, nagpa-athag sang iya suhestyun agud masolusyunan ang problema sa riding-in-tandem nga suspect sa mga krimen sa syudad

Iloilo City–Nagpa-athag si Supt. Jonathan Pablito, hepe sang Police Station 1 sa iya proposal sa mga naga-motorsiklo sa syudad pareho sang pagdumili sa pag-angkas kon indi related ang nagasakay ilabe na kon lalaki; pagdumili sa pagsuksok sang helmet, bonnet ukon anuman nga tabon sa nawong kag pagpatuman sang Oplan Visa ukon pagpa-rehistro sang mga nagamotorsiklo.

Suno kay Pablito, katuyuan sang iya proposal nga maaksyunan ang madamo nga kaso sang pagpamatay nga kahimuan sang riding-in-tandem.

Ginbasehan niya ang ginapatuman sa Mandaluyong City nga ginadumili ang backrider kun indi himata sang driver ilabe na kun pareho nga lalaki ang sakay. Sa Tuguegarao City suno sa iya, ginapatuman ang Oplan Visa nga pareho sa Oplan Clean Rider sa diin ang tanan nga motorsiklo nga naga-agi sa siyudad, kinahanglan mag-rehistro kag gina-issuehan sang daku nga ID ang driver. May mga lugar man sa pungsod suno kay Pablito nga nagadumili sang paggamit sang helmet kag bonnet sang mga nagamotorsiklo.

Pananglitan nga mapatuman ang bisan diin sa amu nga tikang, dapat suno kay Pablito nga tutukan ang enforcement. Mapaslawan suno sa iya ang tikang kon indi pag-ugyunan sang tanan kag itugyan lang sa ahensiya sang gobyerno pareho sang Public Safety and Transportation Management Offie ukon PSTMO. (AGB)