(UPDATE) Pamilya sang mag-iloy nga nahulog sa jeep sa Molo resulta sang kamatayon sang lapsag, indi na magpasaka sang kaso sa driver

Iloilo City–Indi na magpasaka sang kaso ang pamilya sang mag-iloy nga nahulog sa depasahero nga jeep nga Calumpang kahapon, Nobyembre 30, batuk sa driver nga si Milbert Guiao, 30 anyos sang Barangay Calaparan, Arevalo.

Suno kay PO2 Louie James Abantao, imbestigador sang Molo Police Station, ginhilway nila si Guiao matapos nga naghisugot sa pamilya sang mag-iloy nga sanday Mary Joy Bangcas, 33, kag napatay nga si Baby Alyana, apat ka bulan, nga buligan ang pamilya sa kagastuhanan.

Nanugid man si Mary Joy suno sa pulis nga indi madasig ang dalagan sang jeep.

Nagapungko sa front seat ang iloy upod sa lapsag sang nahulog matapos ginlikawan ni Guiao ang nagtabok nga tigulang nga babayi. Dungan nga nahulog ang mag-iloy suno sa driver pero posible nga nabuy-an sang iloy ang iya lapsag kag wala gid nakasalbar.

Nakaguwa naman sa ospital ang iloy matapos ginpaidalum sa xray ang iya tiil. Pero mabalik pa sa ospital si Mary Joy sa masunod nga semana bangud operahan ang iya tiil. (AGB)