2 ka hubog, nagtapungulay bangud sa ihi sa Mandurriao

Iloilo City — Ginpa-prisu ni Airport, Mandurriao Barangay Kagawad Alma Ylalim ang duha ka hubog matapos nadakpan nga nagatapungolay sa Barangay Airport kagab-i, Disyembre 2.

Ginkilala ang mga ginpaprisu kanday Roy Oplas kag Glen Abrasaldo nga lunsay pangayaw kag naga-trabaho lang sa amu nga lugar.

Suno kay Abrasaldo, naga-inom-inom sila ni Oplas antes natabu ang insidente. Nagpangihi suno sa iya sa atop si Oplas kag nag-ilig ang ihi sa kusina kag natabuan nga may nagaluto.

Ginsaway niya si Oplas apang wala nagpamati. Ini ang kabangdanan suno sa iya nga nagtapungolay sila nga duha. (JoMaque/AS)