80-anyos nga magulang sa Balasan patay matapos ginkastigo kag ginbuno sa puwak sang tinidor sang iya 63-anyos nga manghod

Balasan, Iloilo — Patay ang 80-anyos nga magulang matapos ginpahayag ginkastigo kag ginbuno sang iya 63-anyos nga manghod gamit ang tinidor sa Barangay Panian.

Suno kay Police Inspector Alexander Lauron, hepe sang Balasan Police Station, nasapwan ang biktima nga si alyas Aida nga may pilas sa tutunlan kag may mga lagob sa nagkalain lain nga parte sang iya lawas.

Luyag pa paguwaon sang suspetsado nga si alyas Nestor nga nagbitay ang biktima apang nag-ako man ang suspect sa krimen suno kay Lauron.

Narecover sa crime scene ang tinidor nga may tinulo sang dugo. Dugang sang pulis, may mga tinulo man nga dugo nga nakita sa kudal sa palibot sang balay.

‘AWAY SA DUTA’
Away sa duta ang ginasundan nga motibo sang pulis sa pagpatay kay Aida.

Suno kay Lauron, luyag sang suspetsado nga ibaligya ang ila duta apang indi magpasugot ang biktima.

Upod nga nagapuyo sa balay ang mag-utod nga lunsay mga laon.

‘GIN-AKO ANG KRIMEN’
Gin-ako sang suspetsado suno kay Lauron nga ginhimo niya ang krimen.

Preso subong sa Balasan Police Station si alyas Nestor. (JoMaque/ATT)