BANGKAY SANG LAPSAG NGA NAPATAY MATAPOS NAHULOG SA JEEP, NATALANA NGA DAL-UN SA ILA BALAY

Arevalo, Iloilo City–Natalana dal-un sa ila balay subong nga adlaw, Disyembre 3, ang bangkay sang apat ka bulan nga lapsag nga si Baby Alyana.

Napatay ang lapsag matapos nahulog sa jeep sang Nobyembre 30 sang aga. Ginasabak si Baby Alyana sang iya iloy nga si Mary Joy Bangcas, 33-anyos sang Zone 10, Calaparan, Arevalo sa front seat sang jeep sang gulpi lang ginwarik sang driver nga si Milbert Guiao ang manibela agud likawan ang nagtabok nga tigulang.

Wala nakapanguyapot ang iloy kabangdanan nahulog sila sang lapsag. Wasak ang ulo ni Baby Alyana.

Nagbalik sa ospital subong nga adlaw ang iloy bangud sang pilas sa iya tiil.

Ginpagguwa naman ang driver sa prisuhan kag wala na plano kasuhan sang pamilya. Gin-ako ni Guiao nga nahibaluan niya nga bawal ang bata sa front seat pero nagsalig siya bangud lapit man lang ang panaugan ni Mary Joy.

Magkasilingan sanday Mary Joy kag ang driver.

Ginpasalig ni Guiao nga magabulig siya sa mga kagastuhanan sang mag-iloy sa ospital kag pagpalubong sa lapsag.

(MOrtega)