Mga barangay kapitan, ginapahug sang chief of staff ni Congressman Jerry Treñas agud magtakud sang posters sa barangay hall suno kay Mayor Joe Espinosa; akusasyon sang alkalde, gintawag sang kongresista nga binutig sang desperado nga tawo

Iloilo City–Hatagan ni Mayor Joe Espinosa sang tiun ang mga punong barangay nga pangkakason ang posters sang mga pulitiko sa ila barangay hall kag gym.

Kon indi magpati ang mga kapitan, ang city government na suno sa alkalde ang mangkakas sang  mga posters.

Plano ni Espinosa nga padal-an sang sulat ang mga kapitan agud hingyuon nga sila mismo ang makakas sang mga posters Ginpahayag pa ni Espinosa nga kalabanan man sang mga kapitan ang indi gusto nga pamutangan sang posters ang mga barangay hall kag gym apang ginpahayag nga ginapahog sila sang chief of staff ni Congressman Jerry Treñas nga si Jonas Belosillo.

‘Butig’

Ginpanginwala ni Congressman Treñas nga ginapahug ukon ginapwersa sang iya kampo ang mga punong barangay agud itakud ang ila posters sa mga barangay hall.

Gintawag man ni Treñas nga butig sang desperado ang pahayag ni Mayor Joe Espinosa nga ginapahug sang iya chief of staff ang mga kapitan.

Balos ni Treñas, ginagamit ni Espinosa ang pondo sang syudad agud magpahimo sang tarpaulin nga ginabutang sa mga plaza, eskwelahan, barangay kag iban pa nga lugar. Ginakwestyun sang kongresista kon ginapasugtan sang accounting kag budget office ang pagamit sang kuwarta sang syudad para sa ginpahayag niya pamulitika sang grupo ni Espinosa. (AGB)